مدبولي: ناس سايبة بطاقات التموين في المخابز وبتاخد ٣٥٠ جنيه في الشهر
قال مصطفى مدبولي رئيس الوزراء إن “الدولة لا تزال تدعم رغيف الخبز بـ 1 جنيه بعد رفع سعره لـ20 قرشا، ولو عدد الأسرة 5 أفراد يبقى بيحصلوا على دعم 750 جنيها على رغيف الخبز شهريا”.
وأضاف: “ناس كتيرة سايبة بطاقات التموين في المخابز مقابل إنهم بياخدوا مبلغ في الشهر حوالي 300 إلى 350 جنيها والمبلغ الباقي كله بيروح لصاحب المخبز، والأولى المبلغ كله يروح للأسرة ويبقى في حسابها وعلشان كده إحنا جادين في تطبيق الدعم النقدي ولكن نطلب من الحوار الوطني آليات ومعايير لتطبيق الدعم النقدي بشكل فيه حوكمة ويضمن وصول الدعم لمستحقيه وكيفية عمل الزيادات السنوية وتوزيع الدعم على شرائح”.
وأشار إلى أن زيادة أسعار تعريفة وسائل النقل تتم وفق آليات محددة، ولا يمكن إعلان تحريك أسعار المواد البترولية بصورة مسبقة حتى لا يؤدي ذلك لممارسات خاطئة لا حد لها ومنها عملية التخزين. وتابع: “بيقولوا الحكومة بتنكد علينا دايما في الإجازات برفع أسعار المواد البترولية ولكن الهدف إننا ناخد القرار المواطن قاعد في البيت بحيث يحدث تنسيق مع مقدم الخدمة في الشارع مثل السائقين علشان لما المواطن ينزل يلاقي الحاجة معروفة والتعريفة معلنة”.
وأكمل: “أنا عارف إن فيه تحمل على المواطن ولكن إحنا كحكومة مش هنقدر نتحمل عبء الفجوة الكبيرة ما بين سعر التكلفة والأسعار الحالية، هنوفر الفجوة منين؟ لازم نحرك الأسعار ولو بشكل تدريجي علشان نقلل الفجوة”.
